(чанд  сухани  муқаддимавӣ  дар  ҳошияи   маҳфили  навбатии 

 «Ҷаҳони  фарҳангӣ»-и   кафедраи  филология  таҳти  унвони

 «МАВЛОНО   ВА  МО» — 29-09-2021,  синфхонаи  №20  соати  10  00–11 00)

              Таърихи  29- сентябри  соли  ҷорӣ  дар  синфхонаи  № 20   соати  10 00  маҳфили  вежае  дар  ростои  таҷлили  Рӯзи  ҷаҳонии  Мавлоно  доир  гардид,  ки  бо  ибтикор  ва  ташаббуси  кафедраи  филологияи  донишкада  иттифоқ  афтод.  Дар  маҳфил,  ки  дар  шакли  дарс-семинар  доир  гардид  мудирият  ва  омӯзгорони  кафедраи  филология,   устодону  донишҷӯёни  факултаи  санъати  театрӣ  бо  шумули  ҳунармандони  мардумии  Ҷумҳурии  Тоҷикистон  Мирзоватан  Миров  ва  Тағоймурод  Розиқов,  садри   факултети  санъати  театрӣ  Собир  Боев,  муовини  декани  факулта  Дилшод  Умаров,  мудири  кафедраи  рӯзноманигори  телевизион  Зулфия  Мирзода  ва  ихлосмандони  шеъри  Мавлоно  ширкат  доштанд.

             Дар  дарс-семинар  гузориши  устоди  кафедраи  филология  Нозим  Нурзода  таҳти  унвони  «Мавлоно  ва  имрӯз»  мавриди  истимоъ  ва  баррасӣ  қарор  гирифт.  Баъдан  ҳунармандони  мардуми  Мирзоватан  Миров,   Тағоймурод  Розиқов  ва  дигарон  доир  ба  паҳлуҳои  гуногуни  эҷодиёти  Мавлоно  изҳори  назар  карданд.

             Мо  ҳам  ба  сифати  як  шунавандаи  ин  дарс-семинар  чанд  андешаи  хешро  иҷмолан  баён  мекунем:

1.Мавлоно  дар  таърихи  адабиёту  фарҳанги  мо  ба  сифати  як  симои  мондагорӣ  миллӣ  мақом  ва  ҷойгоҳи  махсус  дорад.

2. Мавлоно ба  сифати  як  шахсияти  матраҳи  миллӣ  дар  се  буъди  маънавӣ – тасаввуф,   адабиёт  ва  фалсафа  қувваозмоӣ  карда  дар  ҳар  се  буъд  ҳам  муввафақ  шудааст.

3. Мавлоно ҳамеша  ба  он  кӯшидааст,  ки  шеърро  бо  ирфон  ва  фалсафа  омезиш  диҳад  ва  аз  ҳосилаи  ин  се  ҷавҳари  маънавӣ  барои  ҷомеаи  вақти  худ   суду  фоидаҳое  ба  армуғон  биоварад.

Ривояту  ҳикояту  қиссаҳое,  ки  Мавлоно  дар  «Маснавии  Маънави»  ҷо  додааст  баёнгари  рӯҳи  исёнгар  ва  сулҳпарвари  ин  симои  мондагори  милли  аст.

4. Мавлоно ба  воситаи  шеъру  ғазал  ва  таронаву  рубоӣ,  як  навъ  исён  мекунад,  шӯру  вал-вала  меангезад   ва  инсонҳоро  ба  бедорӣ  даъват  мекунад.

5. Ҳамин як  ғазали  машҳури  ӯ  кофист,  ки  ба   маҳорат,   ҳунар  ва  шахсияти    Мавлоно  қоил  шавем:

  1. З-ин  ҳамраҳони  сустаносир  дилам  гирифт,

    Шеъри  Худову  Рустами  дастонам  орзуст.

    З-ин  халқи  пуршикояти  гирён  шудам  малул,

    Он ҳою  ҳую  наъраи  мастонам  орзуст.

    Дӣ  шайх  бо  чароғ  ҳаме  гашт  гирди  шаҳр,

    К-аз  деву  дад  малуламу  инсонам  орзуст…

6.Мавлоно чи  дар  гузашта  ва  чи  имрӯз  барои  сахт  зарур  аст  ва  мероси  гаронбаҳои  ӯ   дар  ин  вазъияти  ҳассосӣ  сиёсӣ  ва  геополитикӣ  мададгори  ҷомеаи  мо  хоҳад  буд.  Мо  аз  мероси  Мавлоно  ҳиммату  бузургӣ,   шарофату  солорӣ,   ишқу  Ватандорӣ   ва  сарбаландиву  сарафрозиро  меомӯзем.

7.Ташкил ва  баргузории  маҳфилу  нишастҳо  ва  ҳамоишу  семинар-машваратҳои  илмӣ-назариявӣ   ва  эҷодӣ  дар  тақвияти  шуур  ва  тафаккури  насли  донишгоҳӣ,  сахт  саҳиманд.  Тавассути  як нишасти  хуби  илмию  эҷодӣ  ва  дарс-семинари  ихтисосӣ  мавзуъҳои  гуногунеро  метавон  матраҳ  кард,  ки  сатҳи  донишу  биниши   ҳайати  омӯзгорӣ  ва  донишҷӯии  донишкадаро   ба  маротиб   боло  мебаранд.

  1. РӮЗИ  ҶАҲОНИИ  МАВЛОНО  МУБОРАК !

     

    Дилшод  Умаров.

    Муовини  декани 

    факултети  санъати  театрӣ.