Имрӯз дар Донишкадаи давлатии фарҳанг ва санъати Тоҷикистон ба номи Мирзо Турсунзода бахшида ба Рӯзи ҷаҳонии ханда ва гиромидошти хотираи устоди ҳаҷв, Ҳунарпешаи халқии Тоҷикистон шодравон Аловуддин Абдуллоев бо иштироки намояндагони Вазорати фарҳанги Ҷумҳурии Тоҷикистон, чеҳраҳои саршиноси соҳаи фарҳангу санъати кишвар ва ҳайати устодону донишҷӯёни донишкада чорабинии бошукӯҳу ҷолиби фарҳангӣ баргузор гардид.

Чорабиниро устоди собиқадори донишкада, Ҳунарпешаи халқии Тоҷикистон Тағоймурод Розиқов ҳусни оғоз бахшида, доир ба таърихи рӯзи ханда ва нақшу ҷойгоҳи Аловуддин Абдуллоев дар рушди ҳаҷви тоҷик андешаҳояшро баён намуд. Дар оғози чорабинӣ филми ҳуҷҷатии “Рисолат” доир ба рӯзгор ва осори Ҳунарпешаи халқии Тоҷикистон Аловуддин Абдуллоев пешкаши ҳозирин гардонида шуд.

Ректори донишкада, номзади илмҳои филологӣ, дотсент Назарзода Маҳмуд Мирзо дар навбати худ меҳмононро бо меҳру самимияти хос ба донишкада хайрамақдам гуфта, ҳозиринро ба муносибати Рӯзи ҷаҳонии ханда муборакбод намуд. Мавсуф доир ба таҷлили рӯзи ханда, изҳори назар карда, тазаккур дод, ки онро дар тамоми дунё ба ҳар навъ таҷлил менамоянд ва ин рӯз дар кишварҳои гуногун анъана ва шӯхиҳои ҷолибу ҷаззоберо ба миён овардааст. Дар ин рӯз одамон ба ҳамдигар туҳфаҳо тақдим карда ҳазлу шӯхӣ мекунанд. Рӯзи хандаро дар кишвари мо низ мардум ба таври ғайрирасмӣ дар баробари мардуми тамоми дунё бо шавқи беандоза интизор мешаванд ва дар ин рӯз бо гӯл задани якдигар ва шӯхиҳои безарар хотири якдигарро болида мегардонанд, ки ба ҳукми анъана даромадааст.

Роҳбари муассиса доир ба шахсият ва мероси гаронбаҳои эҷодии Ҳунарпешаи халқии Тоҷикистон Аловуддин Абдуллоев изҳори назар карда, аз баҳогузории бисёр ҳам баланди Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ҳунар ва сабку тарзи нақшофарии Аловуддин Абдуллоев ёдовар шуд, ки ҷолибу шуниданӣ буд.

Ректори донишкада пас аз суханронии худ ба Мастура Ортиқова ҳамсари Ҳунарпешаи халқии Тоҷикистон Аловуддин Абдуллоевро барои гиромидошти хотираи устоди ҳаҷв, ҷиҳати иштирок дар чорабинии фарҳангии донишкада ба хотири ин ҳунарманди асил ва рӯзи ханда бо руҳияи баланди ватандӯстию меҳанпарастӣ, хештаншиносию худогоҳӣ, гиромидошти мероси фарҳангӣ ва арзишҳои миллӣ ба ифтихори Рӯзи умумиҷаҳонии ханда бо Сипоснома қадрдонӣ намуд. Инчунин, омӯзгори донишкада Асадуллозода Шуҷоат низ барои дар сатҳи баланд омода намудани барномаи фарҳангӣ бо Сипоснома қадрдонӣ гардид.

Сипас, чеҳраҳои саршиноси соҳаи санъату фарҳанг, ҳунарпешагони халқии Тоҷикистон Ортиқи Қодир, Қурбони Собир, Лутфулло Давлатов, ҳунарманд Саидҷаъфари Ҷалол ва Мастура Ортиқова суханронӣ намуда, аз Ҳунарпешаи халқии Тоҷикистон Аловуддин Абдуллоев ҳамчун инсони шариф, ҳунарманди асил, фидоии касби хеш ёдовар шуданд, тамоми умри хешро барои инкишофи ҳаҷви тоҷик ва фарҳангу санъати миллӣ сарфа намудааст.

Дар бахши фарҳангии чорабинӣ дар иҷрои ҳунарманд Саидҷаъфари Ҷалол суруди марғубе дар васфи Ҳунарпешаи халқии Тоҷикистон Аловуддин Абдуллоев ва намоишномаи “Лаку Пак”-и Абдулҳафиз Қодирӣ таҳти когардонии Асадуллозода Шуҷоат пешкаши ҳозирин гардонида шуд, ки донишҷӯёни донишкада бо нақшбозии ҷолиб ва базлагӯиву ҳаҷвҳои намакин хотири ҳамагонро шод намуданд.

 

ҚУДРАТОВ СИНО